Vipāko dhammo nevavipākanavipākadhammadhammassa vippayuttapaccayena paccayo— sahajātaṁ, pacchājātaṁ. Sahajātā—vipākā khandhā cittasamuṭṭhānānaṁ rūpānaṁ vippayuttapaccayena paccayo; paṭisandhikkhaṇe vipākā khandhā kaṭattārūpānaṁ vippayuttapaccayena paccayo; khandhā vatthussa vippayuttapaccayena paccayo. Pacchājātā—vipākā khandhā purejātassa imassa kāyassa vippayuttapaccayena paccayo.