Abyākataṁ dhammaṁ sahajāto abyākato dhammo uppajjati hetupaccayā— vipākābyākataṁ kiriyābyākataṁ ekaṁ khandhaṁ sahajātā tayo khandhā cittasamuṭṭhānañca rūpaṁ, tayo khandhe sahajāto eko khandho cittasamuṭṭhānañca rūpaṁ, dve khandhe sahajātā dve khandhā cittasamuṭṭhānañca rūpaṁ; paṭisandhikkhaṇe vipākābyākataṁ ekaṁ khandhaṁ sahajātā tayo khandhā kaṭattā ca rūpaṁ, tayo khandhe sahajāto eko khandho kaṭattā ca rūpaṁ, dve khandhe sahajātā dve khandhā kaṭattā ca rūpaṁ; khandhe sahajātaṁ vatthu, vatthuṁ sahajātā khandhā; ekaṁ mahābhūtaṁ sahajātā tayo mahābhūtā, tayo mahābhūte sahajātaṁ ekaṁ mahābhūtaṁ, dve mahābhūte sahajātā dve mahābhūtā, mahābhūte sahajātaṁ cittasamuṭṭhānaṁ rūpaṁ kaṭattārūpaṁ upādārūpaṁ.