Pītisahagato dhammo pītisahagatassa dhammassa vipākapaccayena paccayo— pītisahagato vipāko eko khandho tiṇṇannaṁ khandhānaṁ vipākapaccayena paccayo …pe… dve khandhā dvinnaṁ khandhānaṁ …pe… paṭisandhikkhaṇe pītisahagato eko khandho tiṇṇannaṁ khandhānaṁ …pe… dve khandhā dvinnaṁ khandhānaṁ …pe….

Sukhasahagato dhammo pītisahagatassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. Pakatūpanissayo—sukhasahagataṁ saddhaṁ upanissāya pītisahagatena cittena dānaṁ deti …pe… diṭṭhiṁ gaṇhāti. Sukhasahagataṁ sīlaṁ …pe… patthanaṁ sukhasahagataṁ kāyaviññāṇaṁ upanissāya pītisahagatena cittena dānaṁ deti …pe… nigamaghātaṁ karoti. Sukhasahagatā saddhā …pe… patthanā sukhasahagataṁ kāyaviññāṇaṁ pītisahagatāya saddhāya …pe… patthanāya upanissayapaccayena paccayo.

Sukhasahagato dhammo upekkhāsahagatassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. Pakatūpanissayo—sukhasahagataṁ saddhaṁ upanissāya upekkhāsahagatena cittena dānaṁ deti …pe… abhiññaṁ uppādeti …pe… diṭṭhiṁ gaṇhāti. Sukhasahagataṁ sīlaṁ …pe… patthanaṁ sukhasahagataṁ kāyaviññāṇaṁ upanissāya upekkhāsahagatena cittena dānaṁ deti …pe… nigamaghātaṁ karoti. Sukhasahagatā saddhā …pe… patthanā sukhasahagataṁ kāyaviññāṇaṁ upekkhāsahagatāya saddhāya …pe… patthanāya upanissayapaccayena paccayo.

Sukhasahagato dhammo pītisahagatassa ca sukhasahagatassa ca dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—sukhasahagataṁ saddhaṁ upanissāya pītisahagatena ca sukhasahagatena ca cittena dānaṁ deti …pe… diṭṭhiṁ gaṇhāti. Sukhasahagataṁ sīlaṁ …pe… patthanaṁ sukhasahagataṁ kāyaviññāṇaṁ upanissāya pītisahagatena ca sukhasahagatena ca cittena dānaṁ deti …pe… nigamaghātaṁ karoti. Sukhasahagatā saddhā …pe… patthanā sukhasahagataṁ kāyaviññāṇaṁ pītisahagatāya ca sukhasahagatāya ca saddhāya …pe… patthanāya upanissayapaccayena paccayo.

Upekkhāsahagato dhammo upekkhāsahagatassa dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—upekkhāsahagataṁ saddhaṁ upanissāya upekkhāsahagatena cittena dānaṁ deti …pe… abhiññaṁ uppādeti …pe… diṭṭhiṁ gaṇhāti. Upekkhāsahagataṁ sīlaṁ …pe… patthanaṁ upanissāya upekkhāsahagatena cittena dānaṁ deti …pe… nigamaghātaṁ karoti. Upekkhāsahagatā saddhā …pe… patthanā upekkhāsahagatāya saddhāya …pe… patthanāya upanissayapaccayena paccayo.

Upekkhāsahagato dhammo pītisahagatassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. Pakatūpanissayo—upekkhāsahagataṁ saddhaṁ upanissāya pītisahagatena cittena dānaṁ deti …pe… diṭṭhiṁ gaṇhāti. Upekkhāsahagataṁ sīlaṁ …pe… patthanaṁ upanissāya pītisahagatena cittena dānaṁ deti …pe… nigamaghātaṁ karoti. Upekkhāsahagatā saddhā …pe… patthanā pītisahagatāya saddhāya …pe… patthanāya upanissayapaccayena paccayo.

Upekkhāsahagato dhammo sukhasahagatassa dhammassa upanissayapaccayena paccayo— ārammaṇūpanissayo, anantarūpanissayo, pakatūpanissayo …pe…. Pakatūpanissayo—upekkhāsahagataṁ saddhaṁ upanissāya sukhasahagatena cittena dānaṁ deti …pe… diṭṭhiṁ gaṇhāti. Upekkhāsahagataṁ sīlaṁ …pe… patthanaṁ upanissāya sukhasahagatena cittena dānaṁ deti …pe… nigamaghātaṁ karoti. Upekkhāsahagatā saddhā …pe… patthanā sukhasahagatāya saddhāya …pe… patthanāya sukhasahagatassa kāyaviññāṇassa upanissayapaccayena paccayo.

Upekkhāsahagato dhammo pītisahagatassa ca sukhasahagatassa ca dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—upekkhāsahagataṁ saddhaṁ upanissāya pītisahagatena ca sukhasahagatena ca cittena dānaṁ deti …pe… diṭṭhiṁ gaṇhāti. Upekkhāsahagataṁ sīlaṁ …pe… patthanaṁ upanissāya pītisahagatena ca sukhasahagatena ca cittena dānaṁ deti …pe… nigamaghātaṁ karoti. Upekkhāsahagatā saddhā …pe… patthanā pītisahagatāya ca sukhasahagatāya ca saddhāya …pe… patthanāya upanissayapaccayena paccayo.

Pītisahagato ca sukhasahagato ca dhammā pītisahagatassa dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—pītisahagatañca sukhasahagatañca saddhaṁ upanissāya pītisahagatena cittena dānaṁ deti …pe… diṭṭhiṁ gaṇhāti. Pītisahagatañca sukhasahagatañca sīlaṁ …pe… patthanaṁ upanissāya pītisahagatena cittena dānaṁ deti …pe… nigamaghātaṁ karoti. Pītisahagatā ca sukhasahagatā ca saddhā …pe… patthanā pītisahagatāya saddhāya …pe… patthanāya upanissayapaccayena paccayo.

Pītisahagato ca sukhasahagato ca dhammā sukhasahagatassa dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—pītisahagatañca sukhasahagatañca saddhaṁ upanissāya sukhasahagatena cittena dānaṁ deti …pe… diṭṭhiṁ gaṇhāti. Pītisahagatañca sukhasahagatañca sīlaṁ …pe… patthanaṁ upanissāya sukhasahagatena cittena dānaṁ deti …pe… nigamaghātaṁ karoti. Pītisahagatā ca sukhasahagatā ca saddhā …pe… patthanā sukhasahagatāya saddhāya …pe… patthanāya sukhasahagatassa kāyaviññāṇassa upanissayapaccayena paccayo.

Pītisahagato ca sukhasahagato ca dhammā upekkhāsahagatassa dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe…. Pakatūpanissayo—pītisahagatañca sukhasahagatañca saddhaṁ upanissāya upekkhāsahagatena cittena dānaṁ deti …pe… abhiññaṁ uppādeti …pe… diṭṭhiṁ gaṇhāti. Pītisahagatañca sukhasahagatañca sīlaṁ …pe… patthanaṁ upanissāya upekkhāsahagatena cittena dānaṁ deti …pe… nigamaghātaṁ karoti. Pītisahagatā ca sukhasahagatā ca saddhā …pe… patthanā upekkhāsahagatāya saddhāya …pe… patthanāya upanissayapaccayena paccayo.

(Yathā paṭiccavāre hetupaccaye evaṁ vitthāretabbā dasa pañhā.)