Akusalo dhammo kusalassa dhammassa upanissayapaccayena paccayo. Pakatūpanissayo—rāgaṁ upanissāya dānaṁ deti, sīlaṁ samādiyati, uposathakammaṁ karoti, jhānaṁ uppādeti, vipassanaṁ uppādeti, maggaṁ uppādeti, abhiññaṁ uppādeti, samāpattiṁ uppādeti. Dosaṁ …pe… mohaṁ …pe… mānaṁ …pe… diṭṭhiṁ …pe… patthanaṁ upanissāya dānaṁ deti, sīlaṁ samādiyati, uposathakammaṁ karoti, jhānaṁ uppādeti, vipassanaṁ uppādeti, maggaṁ uppādeti, abhiññaṁ uppādeti, samāpattiṁ uppādeti. Rāgo … doso … moho … māno … diṭṭhi … patthanā saddhāya … sīlassa … sutassa … cāgassa … paññāya upanissayapaccayena paccayo. Pāṇaṁ hantvā tassa paṭighātatthāya dānaṁ deti, sīlaṁ samādiyati, uposathakammaṁ karoti, jhānaṁ uppādeti, vipassanaṁ uppādeti, maggaṁ uppādeti, abhiññaṁ uppādeti, samāpattiṁ uppādeti. Adinnaṁ ādiyitvā …pe… musā bhaṇitvā …pe… pisuṇaṁ bhaṇitvā …pe… pharusaṁ bhaṇitvā …pe… samphaṁ palapitvā …pe… sandhiṁ chinditvā …pe… nillopaṁ haritvā …pe… ekāgārikaṁ karitvā …pe… paripanthe ṭhatvā …pe… paradāraṁ gantvā …pe… gāmaghātaṁ karitvā …pe… nigamaghātaṁ karitvā tassa paṭighātatthāya dānaṁ deti, sīlaṁ samādiyati, uposathakammaṁ karoti, jhānaṁ uppādeti, vipassanaṁ uppādeti, maggaṁ uppādeti, abhiññaṁ uppādeti, samāpattiṁ uppādeti. Mātaraṁ jīvitā voropetvā tassa paṭighātatthāya dānaṁ deti, sīlaṁ samādiyati, uposathakammaṁ karoti. Pitaraṁ jīvitā voropetvā …pe… arahantaṁ jīvitā voropetvā …pe… duṭṭhena cittena tathāgatassa lohitaṁ uppādetvā …pe… saṅghaṁ bhinditvā tassa paṭighātatthāya dānaṁ deti, sīlaṁ samādiyati, uposathakammaṁ karoti.